• فاطمة إيهاب
• دينا حمدي
• أحمد جلال

فاطمة إيهاب:

انا روحت النمسا ياجماعة!!!

هاى . انا فاطمة ايهاب امين. لسه متخرجة السنة دى من كلية الالسن جامعة عين شمس
كنت باخد كورس ترجمة فى المركز الثقافى المصرى الالمانى (ÄDK) وعرفت انى ممكن اسافر للنمسا عشان اخد كورس المانى فى جامعة كلاجنفورت لمدة اسبوعين . الحمد لله اقنعت اهلى وجهزت اوراقى وسافرت مع صاحبتى دينا .الرحلة كانت طويلة بس كانت جميلة اوى , سافرنا بالطيارة من القاهرة لفيينا فى 3 ساعات ورربع وبعدين خدنا القطر من فيينا لكلاجنفورت خمس ساعات تقريبا . بس السفر بالقطر كان ممتع جدا, شوفنا مناظر طبيعية جميلة و مبقناش عارفين نصور ايه ولا ايه!

اول يوم روحنا الجامعة امتحنا امتحان تحديد مستوى, الحمد لله كنت انا ودينا فى نفس المرحلة لاننا كنا خايفين نتفرق عن بعض بسبب المستوى . كل يوم كنا بنروح الجامعة وبعدين بيبقى فيه جولة سياحية, زورنا اماكن جميلة كتيير وشوفنا بحور وطلعنا جبال ., وكمان روحنا فى اجازة الاسبوع كارنتن وسالزبورج بجد كانت رحلة جميلة زورنا متاحف وكنايس وطلعنا جبال كتيير كنا بنتفرج على المدينة كلها من فوق الجبل بجد كانت رحلة جامدة.

بس ياخسارة الاسبوعين عدوا زى الحلم وفى اخر يوم كان فى حفلة كبيرة فى الجامعة وودعنا اصحابنا اللى اتعرفنا عليهم هناك وكانوا من بلاد مختلفة خدنا اميلاتهم وبنراسلهم لحد دلوقتى وبعدين خدنا القطر لفيينا بردو بس كان فى وقت فاضى قبل معاد الطيارة اتفسحنا شوية فى فيينا وبعدين روحنا المطار وركبنا الطيارة ووصلنا القاهرة الحمد لله فى نفس اليوم بليل .بصراحة انا ماكنتش عايزة امشى من هناك بس فى نفس الوقت اهلى كانوا واحشنى اوى ومهما كان مافيش احلى من بلدى .

لمزيد من الصور

دينا حمدي:

أنا أسمى دينا حمدى إبراهيم محمد, خريجة كلية ألسن – دفعة 2008 , وسافرت النمسا عشان أخد كورس ألمانى لمدة أسبوعين تبع المركز الثقافى المصرى الألمانى (ÄDK) . وده كان فى مدينة كلاجنفورت. بجد الجو هناك مختلف فى كل حاجة تحديدا فى الدراسة . أنا كنت مستمتعة أوى أوى هناك و نفسى أروح تانى وتانى.أحلى حاجة بالنسبة لى أنى أتعرفت على ناس كتير و لحد دلوقتى أحنا مازلنا على إتصال , المناظر الطبيعية بقى دى حاجة تانية. كل حاجة لونه أخضر, وألوان بجد كانت منورة. على فكرة دى فرصة حلوة أوى لأى حد نفسه يتعلم اللغة من أهلها ويشوف حاجات ومناظر طبيعية جميلة, لأنه بجد هيستفيد.
أنا بجد بشكر د. طارق عبدالبارى , لأنه وفر لنا فرصة زى دى وأتمنى أنى  أقدر أسافر تانى للنمسا لأنها فعلا جميلة أوى وفيها كل حاجة ممكن الواحد يبقى عايز يلاقيها فى المكان اللى عايش فيه.

لمزيد من صور دينا حمدي

أحمد جلال:

لمزيد من الصور الخاصة بأحمد جلال